Un recordo especial para pechar o curso

Este fin de curso quixemos despedilo cun recordo especial para o noso alumnado, uns peixes de cores para todos os nenos e nenas do colexio e, para o alumnado de 6.º de Primaria, que remata a súa etapa no centro e comeza un novo camiño, un bonito estoxo personalizado.

Estes agasallos son moito máis ca simples obxectos. Detrás de cada peza hai tempo, esforzo, aprendizaxe e un proxecto social cheo de valor. Foron elaborados pola Fundación Érguete-Integración, coa participación de persoas en situación de vulnerabilidade e persoas que están a cumprir condena, así como coa colaboración do alumnado do CEE Nosa Señora de Lourdes de Aspronaga.

Desde a ANPA Milnenos queremos agradecer sinceramente o traballo, a dedicación e o agarimo de todas as persoas que fixeron posibles estes detalles. Iniciativas coma esta favorecen a inclusión e converten o traballo compartido nunha oportunidade de aprendizaxe e crecemento para todas e todos.

Desexámoslle tamén ao alumnado de 6.º moita sorte na nova etapa que comeza. Agardamos que leve consigo un bonito recordo do seu paso polo colexio.

As familias que desexen apoiar o labor da Fundación poden consultar as diferentes formas de realizar unha doazón na seguinte ligazón:

https://www.fundacionerguete.org/colabora_donar_es.html

Grazas a todas as persoas e entidades que fan posibles proxectos tan fermosos e necesarios!